ໂລກກໍາລັງຮ້ອນຂຶ້ນໃນລະດັບທີ່ບໍ່ເຄີຍມີມາກ່ອນ ເປັນສາເຫດໃຫ້ລະດັບນ້ຳທະເລສູງຂຶ້ນ, ໄພນ້ໍາຖ້ວມ ແລະ ໄພແຫ້ງແລ້ງເກີດເລື້ອຍກວ່າເກົ່າ, ແລະ ເຮັດໃຫ້ລະບົບນິເວດມີການປ່ຽນແປງຢ່າງໃຫຍ່ຫລວງ ເຊິ່ງເປັນໄພຂົ່ມຂູ່ຕໍ່ການດໍາລົງຊີວິດ.
ປັດຈຸບັນຈຶ່ງມີຄໍາຖາມຜຸດຂຶ້ນມາວ່າພວກເຮົາສາມາດເຮັດຫຍັງໄດ້ແດ່? ເຮັດແນວໃດທ່ານຈຶ່ງສາມາດຕິດຕາມ ສຸຂະພາບຂອງໂລກຫນ່ວຍນີ້ທັງຫມົດໄດ້? ພວກເຮົາສາມາດປັບປຸງມັນໄດ້ແນວໃດ?
ໃນໄລຍະ 50 ກວ່າປີທີ່ຜ່ານມາ, ນັບຕັ້ງແຕ່ໄດ້ມີການສົ່ງດາວທຽມຕິດຕາມອາກາດຄັ້ງທໍາອິດການ, ມະນຸດເຮົາໄດ້ນຳໃຊ້ປະໂຫຍດ ຈາກຄວາມສາມາດເຫັນພາບຈາກອະວະກາດ ເພື່ອເຂົ້າໃຈສິ່ງທີ່ເກີດຂຶ້ນກັບໂລກຂອງພວກເຮົາ. ດາວທຽມທີ່ໂຄຈອນຮອບໂລກ ແລະ ຄວາມກ້າວຫນ້າທາງເຕັກໂນໂລຊີອື່ນໆ ເຮັດໃຫ້ ນັກວິທະຍາສາດສາມາດເບິ່ງພາບຂະຫນາດໃຫຍ່, ເກັບກໍາຂໍ້ມູນຂ່າວສານຫລາຍໆປະເພດກ່ຽວກັບດິນຟ້າອາກາດ ແລະ ໂລກຂອງພວກເຮົາ . ຂໍ້ມູນເຫຼົ່ານີ້ ໄດ້ຖືກເກັບກໍາເປັນເວລາຫຼາຍ ປີ, ສາມາດຊ່ວຍເຫຼືອຊຸມຊົນສ້າງຄວາມເຂັ້ມແຂງທົນທານ ແລະ ປັບຕົວເພື່ອຮັບມືກັບຜົນກະທົບຂອງການປ່ຽນແປງດິນຟ້າອາກາດ.
ບົນພື້ນຖານການຮ່ວມມືທີ່ເປັນເອກະລັກ ລະຫວ່າງ USAID ແລະ NASA, SERVIR SEA ກຳລັງນຳໃຊ້ຄວາມສາມາດດ້ານເຕັກໂນໂລຊີອະວະກາດ ແລະ ຂໍ້ມູນເປີດເພື່ອຊ່ວຍແກ້ໄຂບັນຫາສິ່ງແວດລ້ອມທີ່ເປັນບັນຫາຮີບດ່ວນທີ່ສຸດ.
ອີງຕາມແຜນງານຂໍ້ມູນທາງພູມສາດພື້ນທີ່ເພື່ອການພັດທະນາເຊິ່ງເປັນແຜນງານຫ້າປີ (2014-2019), SERVIR SEA ເຮັດວຽກໂດຍເປັນຄູ່ຮ່ວມງານ ກັບອົງການຈັດຕັ້ງແຖວໜ້າຢູ່ພາກພື້ນເພື່ອຊ່ວຍພາກພື້ນແມ່ນ້ໍາຂອງຕອນລຸ່ມໃນການໃຊ້ຂໍ້ມູນຂ່າວສານ ທີ່ໄດ້ຈາກດາວທຽມສຳຫລວດໂລກ ແລະ ເຕັກໂນໂລຊີທາງພູມສາດພື້ນທີ່ ໃນການຄຸ້ມຄອງຄວາມສ່ຽງຈາກດິນຟ້າອາກາດ. ພາກພື້ນດັ່ງກ່າວປະກອບດ້ວຍກໍາປູເຈຍ, ສ. ປ. ປ. ລາວ, ມຽນມາ, ໄທ ແລະ ຫວຽດນາມ.
ກິດຈະກໍາຂອງ SERVIR SEA ທີ່ໄດ້ກຳນົດໄວ້ ເພື່ອບັນລຸຕາມຈຸດປະສົງ ມີດັ່ງຕໍ່ໄປນີ້:
- ສ້າງຄວາມອາດສາມາດດ້ານວິຊາການໃຫ້ແກ່ຜູ່ມີອຳນາດໃນການຕັດສິນໃຈຂອງລັດຖະບານ ແລະ ບັນດາອົງການສັງຄົມທີ່ສໍາຄັນ ແລະ ໃຫ້ແກ່ອົງການຈັດຕັ້ງທີ່ກ່ຽວຂ້ອງ ເພື່ອເຊື່ອມສານຂໍ້ມູນຂ່າວສານທາງພູມສາດພື້ນທີ່ເຂົ້າໃນການຕັດສິນໃຈ, ການວາງແຜນ, ແລະການສື່ສານຂອງພາກສ່ວນທີ່ກ່າວຂ້າງເທິງ.
- ປັບປຸງການແລກປ່ຽນຂໍ້ມູນທາງພູມສາດພື້ນທີ່ ທີ່ປຸງແຕ່ງສຳລັບຜູ້ຊົມໃຊ້, ຜົນຜະລິດແລະ ການບໍລິການ.
- ພັດທະນາຂໍ້ມູນໃຫມ່ທີ່ຕ້ອງການຈາກຜູ່ຊົມໃຊ້ ແລະ ມີຄຸນະພາບສູງ, ເຄື່ອງມື, ການນຳໃຊ້, ແລະ ແບບຈຳລອງທີ່ແກ້ໄຂບັນຫາພື້ນຖານຕົວຈິງທີ່ເປັນບູລິມະສິດ
- ສ້າງສູນ SERVIR-SEA ໃຫ້ເຂັ້ມແຂງເພື່ອເປັນຜູ່ໃຫ້ການບໍລິການພາກພື້ນ ດ້ານຂໍ້ມູນທາງພູມສາດພື້ນທີ່, ການວິເຄາະ ແລະ ການສ້າງຄວາມອາດສາມາດ
ສູນກຽມພ້ອມປ້ອງກັນໄພພິບັດອາຊີ (ADPC), ແມ່ນສູນທີ່ເປັນທີ່ຮັບການຍອມຮັບ ແລະ ເປັນຜຸ່ນຳໃນການສ້າງຄວາມເຂັ້ມແຂງທົນທານຕໍ່ໄພພິບັດຢູ່ໃນເຂດອາຊີ ແລະ ເປັນຜູ້ຈັດຕັ້ງປະຕິບັດຫຼັກ ຂອງ SERVIR SEA. ຄູ່ຮ່ວມງານ ອື່ນໆໃນກຸ່ມບໍລິສັດ ຍັງມີ Spatial Informatics Group (SIG), ສະຖາບັນ ສິ່ງແວດລ້ອມ Stockholm (SEI) ແລະ Deltares, ເຮັດໜ້າທີ່ຊ່ວຍເຫຼືອການຈັດຕັ້ງປະຕິບັດ ໂຄງການ SERVIR SEA ແລະ ນຳເອົາຄວາມຮູ້ຄວາມສາມາດພິເສດ ເພື່ອຊ່ວຍໃຫ້ການບໍລິການຢູ່ພາກພື້ນ.